: PCOL Marlon V. Rufo (Batangas Provincial Police Office | FB)
Personal na nagsampa ng reklamong administratibo sa National Police Commission (NAPOLCOM) ang isang policewoman laban kay Police Colonel Marlon Ventura Rufo, Provincial Director ng Batangas, dahil sa umano’y grave misconduct at conduct unbecoming of a police officer.
Sa sinumpaang salaysay, inilatag ng complainant ang serye ng mga insidente na umano’y naganap mula Pebrero hanggang Marso 2026.
Kabilang ang hindi kanais-nais na pisikal na pagdampi, mga hindi angkop na pahayag, at mga kilos na nagdulot ng matinding pagkabalisa, na umano’y nangyari sa loob ng opisyal na tungkulin at sa mismong himpilan ng pulisya.
Ayon sa affidavit, sinamantala umano ng respondent ang kanyang mataas na posisyon bilang opisyal, na nagbubukas ng seryosong usapin hinggil sa pang-aabuso ng kapangyarihan, kaligtasan sa lugar ng trabaho, at propesyonal na asal sa loob ng Philippine National Police (PNP).
Kinompirma ng NAPOLCOM na nasa kanilang hurisdiksiyon na ang reklamo at ito ay daraan sa tamang proseso ng administratibo alinsunod sa umiiral na batas at regulasyon.
Binigyang-diin ng Komisyon na ang mga reklamong may ganitong katangian, lalo na kung kinasasangkutan ng kababaihang naka-uniporme, ay haharapin nang may agarang aksyon, patas na pagdinig, at masusing proseso.
Muling nanawagan ang NAPOLCOM sa lahat ng miyembro ng PNP na panatilihin ang pinakamataas na pamantayan ng propesyonalismo, respeto, at integridad, at iginiit na ang pamumuno ay dapat laging nakaugat sa pananagutan at moral na awtoridad. # (RRN)