Binatikos ng mga progresibong mambabatas mula sa Makabayan bloc nitong Lunes ang panukala ni Sen. Alan Peter Cayetano na magsagawa ng snap election, na tinawag nilang isang “klasikong taktika ng pag-iwas” upang ilihis ang atensyon ng publiko mula sa mga seryosong usapin ng korapsyon at pananagutan sa pamahalaan.
“Tipikal na panlilito sa tunay na isyu ng korapsyon,” ayon sa matapang na pahayag ng bloc. “Pinipilit ni Cayetano na ilihis ang pokus mula sa pananagutan sa korapsyon patungo sa snap elections, na nagbibigay ng ilusyon na ang korapsyon ay malulutas sa pamamagitan lamang ng prosesong elektoral na kontrolado pa rin ng mga political dynasty at tiwaling politiko.”
Ipinanukala ni Cayetano ang snap election sa gitna ng lumalawak na galit ng publiko kaugnay ng umano’y maling paggamit ng pondo ng bayan at mga kuwestiyonableng insertion sa badyet.
Ngunit iginiit ng Makabayan na ang naturang mungkahi ay hindi tumutugon sa ugat ng sistemikong korapsyon at sa halip ay maaaring magpahupa sa lehitimong protesta ng mamamayan.
“Paano matutugunan ng snap elections ang isyu ng pananagutan?” tanong ng bloc. “Ang panukala ay isang panggulo at paraan para buhusan ng malamig na tubig ang protesta ng taumbayan.”
Babala nila, walang saysay ang pagpapalit lamang ng mga personalidad kung walang kasamang repormang istruktural.
“Ang snap election at simpleng pagpapalit ng mga mukha nang hindi binabago ang sistema at hindi tutugon sa ugat ng korapsyon,” saad pa sa pahayag.
Muling iginiit ng Makabayan ang panawagan para sa transparency, independiyenteng imbestigasyon, at mga reporma sa institusyon upang buwagin ang nakaugat na patronage politics.
“Ang kailangan natin ay hindi simpleng pagpapalit ng mukha, kundi pagbabago ng mismong sistema,” diin ng bloc.
Sa patuloy na pagtaas ng panawagan para sa pananagutan, hinimok ng Makabayan ang publiko na manatiling mapagmatyag at tanggihan ang mga pagtatangkang pahinain ang sigaw para sa hustisya sa pamamagitan ng “kosmetikong solusyong pampulitika.” (ROSE NOVENARIO)