Mariing kinondena ni Bayan Muna Chairperson Neri Javier Colmenares si Vice President Sara Duterte matapos nitong purihin ang 79th Infantry Battalion ng Philippine Army kaugnay ng operasyon noong Abril 19 sa Toboso, Negros Occidental na nagresulta sa pagkamatay ng 19 katao,isang insidente na tinuturing ng mga grupong pangkarapatang pantao bilang masaker.
Ayon kay Colmenares, isang abogadong tubong-Negros, ang pahayag ni Duterte ay malinaw na “pagdiriwang sa karahasan” sa panahong ang mga pamilya at komunidad ay humihingi ng kasagutan.
“Ang pagpuri sa isang yunit sa gitna ng mabibigat na alegasyon ng labis na puwersa at pagkamatay ng sibilyan ay iresponsable at mapanganib,” ani Colmenares. “Nagpapadala ito ng mensahe na ang pagpatay ang pinakamabilis na daan sa medalya at papuri, imbes na pananagutan at paggalang sa karapatang pantao at internasyonal na batas.”
Dagdag pa niya: “Pinupuri ni VP Duterte ang pagpatay—ganyan ang estilo ng mga Duterte. Basta may bangkay, may papuri. Dapat manaig ang imbestigasyon at pananagutan, hindi ang pagdiriwang ng dugo.”
Panawagan sa malaya at bukas na imbestigasyon
Binigyang-diin ni Colmenares na dapat manaig ang transparency, lalo na’t kinilala ng iba’t ibang grupo ang ilan sa mga nasawi bilang lider-estudyante mula sa UP, isang mamamahayag, at mga tagapagtaguyod ng magsasaka.
“Eksaktong dahilan ito kung bakit kailangan ng independiyenteng imbestigasyon,” aniya. “Pinipilit ang publiko na tanggapin ang isang panig na salaysay habang ang mga pamilya, paaralan, at komunidad ay kumikilala sa mga biktima bilang sibilyang nakikilahok sa gawaing pangkomunidad, pagbabalita, at adbokasiya.”
Muling nanawagan ang Bayan Muna sa Commission on Human Rights na magsagawa ng agarang, malinaw, at walang kinikilingang imbestigasyon, at hinikayat ang Kongreso, lalo na ang House Committee on Human Rights—na ipatawag ang mga kumander at opisyal na responsable sa operasyon, kasama ang mga after-action report, operational order, at iba pang ebidensya.
Babala laban sa red-tagging
Nagbabala rin si Colmenares laban sa red-tagging at paninira sa mga estudyante, mamamahayag, at tagapagtaguyod sa Negros, na aniya’y naglalagay sa panganib ng buhay at lumilikha ng kapaligiran kung saan mas madaling bigyang-katwiran ang mga abuso.
“Hindi dapat huminto ang pananagutan sa gatilyo,” ani Colmenares. “Dapat managot din ang mga nagplano, nag-utos, at nagtangkang magtakip sa mga iligal na aksyon.” # (RRN)