“Hindi dapat namimili ang katarungan at habag batay sa katayuan ng isang tao.”
Ito ang mariing pahayag ni Cubao Bishop Elias Ayuban Jr., CMF, sa kanyang bukas na liham
Binigyang-diin ng obispo na ang hustisya at habag ay hindi dapat nakabatay sa kapangyarihan o posisyon, kundi sa pantay na pagtingin sa lahat ng mamamayan.
Nag-ugat ang kanyang panawagan sa reaksyon ni Sen. Pia Cayetano sa privilege speech ni Sen. Risa Hontiveros hinggil sa kaguluhan sa Senado. Ayon kay Ayuban, ang pagbibigay ng labis na atensyon sa insidente ay taliwas sa katahimikan na bumalot sa libu-libong biktima ng madugong kampanya kontra droga.
“Noong gabi-gabing may duguang bangkay na nakahandusay sa tabi ng estero… kinakamusta mo rin ba at ng 12 mong kasama ang naulilang pamilya?” tanong ng obispo.
Binanggit niya ang kaso ni Kian delos Santos at iba pang biktima ng extrajudicial killings na, aniya, hindi nabigyan ng sapat na pagkilala at katarungan.
“Ang hustisya ba’y may paboritong adres? Ang habag ba’y marunong pumili kung sino lamang ang dapat luklukan ng awa? Mas mabigat ba ang luha kapag ang umiiyak ay may posisyon, at mas magaan kapag ang bangkay ay mula sa laylayan?” dagdag ni Ayuban.
Binalaan ng obispo ang mga mambabatas laban sa madaling paglimot sa sinapit ng mahihirap, at iginiit na sariwa pa rin sa alaala ng sambayanan ang trauma ng libu-libong pamilya.
Hinimok niya ang mga halal na opisyal na isulong ang tunay na paghilom at pagbabago sa lipunan.
“Kaya bago mo muling itanong kung nasaan ang iyong mga kasama, baka dapat mong lingunin ang mga gabing tahimik kang nakatingin habang ang mahihirap ay isa-isang nililibing,” ani Ayuban.
Ang kanyang pahayag ay nagdadagdag ng moral na dimensyon sa umiinit na debate sa Senado, na nagtatanong kung ang hustisya at habag sa Pilipinas ay nakalaan lamang sa makapangyarihan o pantay na ibinibigay sa lahat. # (RRN)