Nakaamba ang malakihang taas-presyo sa mga produktong petrolyo sa susunod na linggo, na inaasahang tataas ng ₱7.09 kada litro ang gasolina at ₱15.33 ang diesel, batay sa pagtataya ng industriya ng langis mula sa unang tatlong araw ng kalakalan.
Opisyal na iaanunsyo ang mga pagbabago sa Lunes at ipatutupad sa Martes. Binalaan ng Department of Energy (DOE) nitong Miyerkules na maaaring tumaas pa ang presyo dahil sa mga pandaigdigang pangyayari, kabilang ang pagsasara ng Strait of Hormuz, at sinabi nitong hihikayatin ang mga kompanya na hati-hatiin ang pagtaas.
Noong Martes, Marso 3, nauna nang nagpatupad ng dagdag-presyo: ₱1.90 kada litro sa gasolina, ₱1.20 sa diesel, at ₱1.50 sa kerosene.
Kabilang sa mga hakbang ng pamahalaan upang maibsan ang epekto ang pagbibigay ng fuel subsidy sa mga transport operator, magsasaka, at mangingisda, gayundin ang libreng sakay sa mga bus.
Sinabi ni Pangulong Ferdinand “Bongbong” Marcos Jr. na pinag-aaralan niya ang pansamantalang suspensyon ng excise tax sa langis, bagaman hindi pa inilalabas ng Department of Finance ang pagtataya sa mawawalang kita ng gobyerno.
Nangyayari ang mga taas-presyo sa gitna ng tumitinding sigalot sa Gitnang Silangan. Kumpirmado ng Iranian state media na napatay sa mga airstrike ng US at Israel nitong weekend si Iranian Supreme Leader Ayatollah Ali Khamenei.
Samantala, inihayag ng Department of Foreign Affairs (DFA) na maaaring tumagal ng apat hanggang walong linggo ang labanan.
Ayon kay DFA Assistant Secretary Germinia Aguilar-Usudan ng Office of Middle East and African Affairs, may mga ulat na nagpapadala ang US ng karagdagang rocket sa Iran at nais nitong magkaroon ng impluwensiya sa pamumuno ng susunod na lider ng bansa. (RRN)