Karapatan: Korupsiyon, Red-Tagging at EJK, Patunay ng Bulok na Rehimen

📷: Karapatan | FB

Nagtipon ang mga tagapagtanggol ng karapatang pantao at mga aktibista sa Liwasang Bonifacio ngayong Pandaigdigang Araw ng Karapatang Pantao upang kondenahin ang patuloy na paglabag sa karapatang pantao at sistematikong korupsiyon sa ilalim ng administrasyon ni Pangulong Ferdinand Marcos Jr.

Pinangunahan ng alyansang pangkarapatang pantao na Karapatan, tinuligsa ng mga nagprotesta ang malakihang korupsiyon sa burukrasya, mga paglabag sa international humanitarian law (IHL), at ang paggamit ng mga batas upang supilin ang pagtutol. Tinawag ng grupo ang kasalukuyang administrasyon bilang “isa sa mga pinaka-bulok na rehimen sa kasaysayan ng bansa.”

Korupsiyon bilang Paglabag sa Karapatan 

Binigyang-diin ni Karapatan Secretary General Cristina Palabay na ang korupsiyon mismo ay isang paglabag sa karapatan ng mamamayan. Inakusahan niya si Marcos Jr. na ginagamit ang kanyang posisyon upang mabawi ang nakaw na yaman ng kanyang pamilya mula sa sequestration at iwasan ang pagbabayad ng multi-bilyong pisong buwis sa ari-arian, bago pa man sumabog ang kontrobersiya sa flood control project.

Tinukoy din ni Palabay ang “pasistang at militaristang kaisipan” ni Bise Presidente Sara Duterte at ang kuwestiyonableng paggamit ng daan-daang milyong piso mula sa Confidential at Intelligence Funds. Binalaan niya na ang pagpapalit kay Marcos Jr. ng “kasing-korap at awtoritaryong kahalili” ay hindi solusyon.

“Bawat pisong ninanakaw ng mga burukratang kapitalista ay pisong inaalis sa kagyat na pangangailangang serbisyo para sa mamamayan,” ayon sa Karapatan, na nagsabing ang korupsiyon, kasama ng mga ipinataw na neoliberal na programa at kontra-insurhensiyang iskema ng U.S., ay lalong nagpalubog sa mga Pilipino sa kahirapan.

Paglabag sa Karapatang Pantao at IHL 

Iniulat ng Karapatan ang nakababahalang bilang mula nang maupo si Marcos Jr. noong Hulyo 2022:

– 134 na extra-judicial killings (EJK)

– 15 enforced disappearances

– 822 arbitrary arrests

– 577 sapilitang o pekeng pagsuko

– 70,028 kaso ng walang habas na pagpapaputok

– 57,156 kaso ng pambobomba

Binanggit din ang 48,247 biktima ng sapilitang ebakwasyon at milyun-milyong nakaranas ng pagbabanta, pananakot, at red-tagging.

Ayon kay Palabay, “Dagdag pahirap ito sa mga magsasaka, manggagawa, at gitnang uri na matagal nang pinahihirapan ng krisis pang-ekonomiya.”

Inakusahan ng grupo ang pamahalaan ng tuloy-tuloy na paglabag sa IHL, kung saan karamihan sa mga biktima ng EJK ay lider-magsasaka na maling inilalarawan bilang rebelde. Ang walang habas na pagpapaputok, pambobomba mula sa himpapawid at artilyeriya ay tinukoy ding paglabag na nakakaapekto sa mga sibilyan at kanilang kabuhayan.

Mga Bilanggong Pulitikal at Ginamit na Batas 

Ipinunto ng Karapatan na daan-daang bilanggong pulitikal ang nakakulong pa rin sa buong bansa, na tinawag nilang “buhay na patunay ng represyon ng rehimen.” Sa ika-apat na kwarter ng 2025, may 696 bilanggong pulitikal, 163 sa kanila ay inaresto sa ilalim ni Marcos Jr., kabilang ang 12 peace consultants ng NDFP.

Dagdag pa ng grupo, ginamit ng pamahalaan ang Anti-Terrorism Act (ATA) at Terrorism Financing Prevention and Suppression Act (TFPSA) upang supilin ang pagtutol. Iniulat na 227 lider-masa at aktibista ang kinasuhan, 30 sa kanila ay nakakulong, habang 34 katao – kabilang ang mga consultant ng NDFP – ay tinaguriang “terorista.”

Kontra-Insurhensiya at Impluwensiya ng U.S. 

Ayon kay Palabay, ang paglalabas ni Marcos Jr. ng National Action Plan for Unity, Peace and Development (NAP-UPD) noong Mayo 2025 ay patunay ng layunin niyang supilin ang lahat ng pagtutol. Sa pamumuno ng NTF-ELCAC, ginagamit umano ng gobyerno ang lahat ng yaman upang i-profile ang mga aktibista, i-red-tag sila, at pilitin silang sumuko bilang rebelde.

“Ang tumatanggi sa bitag ng NTF-ELCAC ay nagiging biktima ng EJK, enforced disappearance, o gawa-gawang kaso,” babala ni Palabay.

Dagdag pa niya, ang NAP-UPD ay pagpapatuloy ng mga kontra-insurhensiyang programa ng U.S., na nakahanay sa National Defense Strategy at Bilateral Defense Guidelines ng Amerika. “Gusto ng U.S. na ang papet nitong si Marcos Jr. ay ipatupad ang kanilang disenyo upang gawing pawn ang Pilipinas sa tunggalian ng kapangyarihan laban sa China,” paliwanag niya.

Ang mga naturang polisiya aniya ay naglalagay sa panganib sa seguridad at kapakanan ng mamamayang Pilipino, na maaaring madamay sa digmaang hindi nila pinili.

Nagmartsa patungong Mendiola ang grupo matapos ang programa sa Liwasang Bonifacio. (ROSE NOVENARIO)