Iimbitahan ng National Bureau of Investigation (NBI) sina Vice President Sara Duterte at Davao City 1st District Representative Paolo Duterte upang makuha ang kanilang panig sa akusasyon na naghatid sa kanila ng male-maletang pera si dating Police Patrolman Rodulfo Gracioso Jr., ayon kay NBI Director Melvin Matibag.
Aanyayahan din aniya si dating House speaker Lord Allan Velasco at misis nito.
“Part of the investigation is also to invite the personalities mentioned in the affidavit. It should not be a subpoena but it should be an invitation, especially to the Vice President,” ani Matibag.
“Sinasabi niya hindi niya kilala ‘yung tao at gusto niya mag kaso. Magbigay kami ng kopya ng affidavits. Just to tell you, ang affidavit po hindi pagaari ng NBI ‘yan… we’ll ask the consent that we will release it. So ‘yung mga pictures ipapakita rin natin, ibibigay natin kay Vice President para siya na mismo magsabi,” dagdag niya.
Nauna nang isiniwalat ni Gracioso na nag=deliver siya ng mela-maletang cash kina VP Sara, dating Pangulong Rodrigo Duterte, at Rep. Paolo Duterte, sa utos umano ni Velasco.
Nagsumite si Gracioso ng mga larawan at mga video sa NBI.
Sumaiilalim aniya si Gracioso sa lie detector bago siya nagbigay ng sinumpaang salaysay.
“Doon sa naging question noon is limited to his identity, relationship sa binabanggit niyang mga tao. So ‘yun ang sinasabi natin na pinasa niya ng 99% ‘yung kanyang test na ‘yun,” ani Matibag.
“But now since meron siyang affidavit, we want to ask him ‘yung questions based on the affidavit. Lahat na ‘yun. Mahabang proseso ng pag lie detector test ‘yan. So pumayag naman siya. He’s very much willing and we will schedule it anytime this week,” dagdag niya.
Hindi aniya maaaring isantabi ng NBI ang buong testimonya ni Gracisoso dahil sa pagkasibak niya sa serbisyo.
“Sapagkat kung hindi totoo ‘yung sinasabi niya, he can be answereable for perjury. So may krimen pa rin nangyari. Kung totoo naman ‘yung sinasabi niya, meron tayong mas malalim na tinitignan,” sabi ni Matibag. # (RRN)