NABULABOG ang netizens sa kumalat na video na magkasama sina Sue Ramirez at Dominic Roque na tila naghalikan sa isang bar sa Siargao.
Sa video na ibinahagi ng Facebook user na si Elaine Joo, magkatabi sina Ramirez at Roque na magkalapit ang mukha, at ang kamay ng aktres ay nasa pisngi ng aktor.
Gayunpaman, hindi agad makumpirma kung naghalikan sa labi ang magkapareha o nag-beso lang dahil medyo madilim ang ilaw sa establisimyento.
Tinanggal ang orihinal na video ngunit ang mga clip mula rito ay muling na-upload sa social media, partikular sa TikTok.
Hindi pa nagkomento sina Ramirez at Roque kaugnay sa isyu pero ang mga personal nilang mga ipinaskil na larawan at video sa kani-kanilang Instagram pages ay kuha sa Siargao pero hindi sila magkasama.
Napabalitang hiwalay na si Ramirez sa kanyang longtime boyfriend na si Bacolod City Mayor Javi Benitez at mapapansin din na matagal na silang hindi nagpo-post tungkol sa isa’t isa sa kani-kanilang IG pages.
Ngunit hindi pa nila kinukumpirma o itinatanggo ang mga ugong na break na sila.
Samantala, si Roque ay dating karelasyon ng aktres na si Bea Alonzo na matapos ianunsyo ang kanilang engagement noong 2023 ay inihayag noong Pebrero 2024 na nagpasya silang maghiwalay. (ZIA LUNA)