PAGBUSAL NG CSC SA MGA KAWANI NG GOBYERNO, KINUWESTIYON NG BAYAN MUNA SA KORTE SUPREMA

📷: Bayan Muna | FB

ILLEGAL at labag sa Konstitusyon ang pagbabawal sa mga kawani ng gobyerno na hayagang magsuporta sa mga kandidato at mga partido political, ayon sa petisyon ng Bayan Muna Partylist na inihain sa Korte Suprema laban sa isang memorandum ng Civil Service Commission (CSC).

Kinuwestiyon nina dating Bayan Muna Representatives Atty. Neri Colmenares at Ferdinand Gaite sa Supreme Court ang  CSC Memorandum Circular No. 3, series of 2025, dahil ito’y pagyurak sa constitutional rights ng mga empleyado ng pamahalaan, partikular ang kanilang “freedom of expression, right to participate in political discourse, and their rights as workers.”

Sa memorandum na inilabas ng CSC noong Marso 17, pinaalalahanan ang government employees na manatiling neutral sa politika at iwasan na lumahok sa mga aktibidad na may kinalaman sa politika bago sumapit ang May 12, 2025 elections.

Tinukoy ang 2016 Commission on Elections-CSC Joint Circular on Electioneering and Partisan Political Activities, na mahigpit na nagbabawal sa mga empleyado ng gobyerno sa ilang political activities.

Isinama ng Commission sa bagong memorandum guidelines nito ang Proper Social Media Use, na nagbabawal sa “posting, sharing or commenting on political content.”

Kinondena ng Bayan Muna ang memo bilang “dangerous move that threatens democratic space.”

“This memo is an overreach and a blatant violation of the constitutional right to freedom of expression,” sabi ni Colmenares.

“It dangerously expands the definition of partisan political activity to include basic online engagement such as liking, sharing, or commenting on political issues. This is outright suppression of thought and opinion,” dagdag ng human rights lawyer.

Giit ng Bayan Muna, lumabis ang memorandum sa nakasaad sa Section 29 ng Republic Act 2260 (batas na nag-amyenda sa Civil Service Act of the Philippines) na nagsaad na ang mga kawani ay maaaring ihayag ang kanilang opinyon sa politika.

Sinabi ng Bayan Muna sa petisyon nito na ang bagong CSC memo ay lumalabag hindi lamang sa batas, kundi sa diwa ng demokrasya.

“Government employees are citizens too. Silencing them is not only unjust—it is undemocratic,” sabi ni Colmenares.

Tinutulan din ni Gaite, isang veteran public sector unionist, ang mga direktiba dahil pagyurak ito sa mga karapatan na dapat ay isulong at ipagtanggol ng mga nasa serbisyo-publiko.

Kasama nina Colmenares at Gaite sa paghain ng petisyon sa SC noong Biyernes, Abril 25, sina dating Bayan Muna Rep. Eufemia Cullamat at Confederation for the Unity, Recognition and Advancement of Government Employees (COURAGE) president Santiago Dasmarinas.  (ZIA LUNA)