LIMANG miyembro ng gabinete ni Pangulong Ferdinand “Bongbong” Marcos Jr. ang nakabitin ang magiging kapalaran sa administrasyon matapos hindi banggitin ang kanilang mga pangalan na mananatili sa puwesto.
Sa inanunsyo ni Executive Secretary Lucas Bersamin Jr. na 21 opisyal na “retained” sa posisyon, hindi kasama ang mga pangalan nina Presidential Communications Office Secretary Jay Ruiz, Presidential Adviser on Poverty Alleviation Larry Gadon, Presidential Adviser on Peace, Reconciliation and Unity Carlito Galvez Jr., National Security Adviser Eduardo Año at Special Assistant to the President Anton Lagdameo.
Naudlot ang pagsalang sana sa deliberasyon ng makapangyarihang Commission on Appointments (CA) ni Ruiz kanina pero binanggit niya na sinabihan siya ni Bersamin na “tuloy ang kanyang trabaho dahil hindi pa wini-withdraw ang kanyang appointment.”
Napag-alaman na bago ang press briefing ni Bersamin ngayong hapon ay matagal umano silang nag-usap ni Ruiz at matapos ito’y tila laglag ang balikat ng press secretary na mahigit tatlong buwan pa lang sa puwesto.
Inihayag ni Bersamin Jr. na pinanatili ni Marcos Jr, sa posisyon sina: Agriculture Secretary Francisco Tiu Laurel Jr., Agrarian Reform Secretary Conrado Estrella III, Education Secretary Sonny Angara, Technical Education and Skills Development Authority director general Jose Francisco Benitez;
Labor Secretary Bienvenido Laguesma, Social Welfare Secretary Rex Gatchalian, Health Secretary Ted Herbosa, Migrant Workers Secretary Hans Leo Cacdac, Science and Technology Secretary Renato Solidum Jr., Tourism Secretary Christina Garcia Frasco;
Information and Communications Technology Secretary Henry Aguda, Transportation Secretary Vince Dizon, Public Works Secretary Manuel Bonoan, Chief Presidential Legal Counsel Juan Ponce Enrile, Presidential Management Staff Secretary Elaine Masukat, Metropolitan Manila Development Authority chairperson Romando Artes;
Mindanao Development Authority chair Leo Terezo Magno, Bureau of Internal Revenue commissioner Romeo Lumagui Jr., Bureau of Customs commissioner Bienvenido Rubio, National Treasurer Sharon Almanza, at Presidential Adviser for Mindanao Concerns Antonio Cerilles.
Tinapos na ni Marcos ang panunungkulan ni Meynard Sabili, chairperson ng Presidential Commission for the Urban Poor; Terence Calatrava, presidential assistant para sa Visayas; at Almarim Tillah, presidential assistant on Muslim affairs.
Ang serbisyo ni Menandro Espineli bilang presidential adviser 0n special concerns ay winakasan ng Pangulo.
Idinagdag ni Bersamin na itinalaga ni Marcos ang abogadong si Francis Lim bilang bagong tagapangulo ng Securities and Exchange Commission, kapalit ng SEC chair na si Emilio Aquino, na ang termino ay magtatapos sa Hunyo 5.
Kasalukuyang isinasaalang-alang ng Pangulo ang kanyang pagpili para sa kanyang unang appointee sa Korte Suprema. (ROSE NOVENARIO)