STATEMENT| ACT: Karahasan ng Estado vs. Protesta , Paglalantad sa Takot ng Rehimeng Marcos

📷: Baha sa Luneta | Kodao Productions

Binabati ng Alliance of Concerned Teachers (ACT) Philippines ang sambayanang Pilipino sa makasaysayang “Baha sa Luneta” at sa malawakang kilos-protesta na sumiklab sa iba’t ibang panig ng bansa kahapon. Umalingawngaw ang mga lansangan sa sigaw ng galit ng mamamayan laban sa katiwalian—isang patunay na ang pagkakaisa ay pinakamabisang sandata ng mga inaapi.

Ngunit ang pagpapakita ng kapangyarihan ng bayan ay sinalubong ng marahas na tugon mula sa estado. Marahas na dinispers ng mga pulis ang mga rally sa Ayala at Mendiola, binugbog ang mga nagpoprotesta, at nagsagawa ng arbitraryong pag-aresto. Sa pinakahuling tala, mahigit 130 ang inaresto, kabilang ang mga menor de edad. Marami ang nasugatan at isinugod sa ospital, at kinumpirma ang isang nasawi dahil sa pananaksak. Patuloy na ipinagkakait sa mga pamilya at abogado ang karapatang makabisita sa mga nakakulong—isang tahasang paglabag sa kanilang karapatan. Nanawagan kami para sa kanilang agarang pagpapalaya at ganap na pananagutan sa mga abusong ginawa ng mga pwersa ng estado.

Mahalagang maunawaan ang katangiang pang-uri ng karahasang ito. Hindi ito simpleng “sobra” o “pagkakamali.” Ang katiwalian at karahasan ay likas sa sistemang burukratikong kapitalismo—isang sistema kung saan ang gobyerno ay ginagawang pribadong negosyo ng mga nasa kapangyarihan, at ang anumang pagtutol ay nilulupig upang mapanatili ang kanilang kapakinabangan. Walang saysay ang mga “anti-corruption” na pananalita ni Marcos Jr. hangga’t nananatiling buo ang pork barrel, confidential funds, at military slush budgets.

Makatarungan at lehitimo ang protesta ng mamamayan. Ang pagragasa ng kilos-masa mula Luneta hanggang Ayala at Mendiola ay salamin ng galit, pagkadismaya, at determinasyong lumaban sa bulok at tiwaling sistemang matagal nang sumasakal sa bayan.

Binansagan ng Palasyo na kriminal ang mga nagpoprotesta. Ngunit sino ba ang tunay na kriminal? Ang nagnanakaw ng bilyon sa ilalim ng tanggapan ng gobyerno, o ang lumalaban sa ganitong pagnanakaw? Sino ang tunay na “gulo”? Ang nagpapahirap sa buhay ng mamamayan sa pamamagitan ng katiwalian at panunupil, o ang humihingi ng pagkain, edukasyon, at katarungan?

Hindi nagtatapos sa isang rally ang laban ng bayan. Nanawagan kami ng tuloy-tuloy at mas pinaigting na mga protesta sa buong bansa hanggang sa mapanagot ang rehimeng US-Marcos sa katiwaliang nagpapagutom sa ating mga paaralan, ospital, at komunidad, at sa pasistang panunupil na ipinapataw sa mamamayan.

Nagsimula na ang baha. Hindi ito hihinto hangga’t hindi nakakamit ang hustisya at tunay na pagbabago.