Iginiit ni Senador Ping Lacson na dapat managot si U.S. President Donald Trump hindi lamang sa kanyang sariling bansa kundi sa buong mundo, matapos pumalya ang tinawag niyang “brinkmanship” na nagdulot ng krisis sa pandaigdigang kalagayan.
Ang brinkmanship ay ang estratehiya o sining ng pagtulak sa isang mapanganib na sitwasyon o komprontasyon hanggang sa bingit ng sakuna o digmaan upang mapilit ang kalaban na sumuko o pumayag sa kagustuhan. Ito ay isang mataas na uri ng sugal o “bluffing” kung saan sinusubok ang tatag ng loob ng kalaban.
Sa isang pahayag sa social media, sinabi ni Lacson na ang Pilipinas, gaya ng ibang bansa, ay nadamay sa krisis dahil sa estratehiya ni Trump na “hindi nagtagumpay” at sa halip ay “bumalik sa kanya.”
“The Philippines is in crisis along with the rest of the world because President Trump’s brinkmanship did not work. In fact, it has boomeranged. He should be held to account by the whole world, including his own country, the USA,” ani Lacson.
Binibigyang-diin ng senador na ang pananagutan ni Trump ay hindi dapat limitado sa loob ng Estados Unidos, kundi dapat ding ipanawagan ng pandaigdigang komunidad.
Ang pahayag ni Lacson ay sumasalamin sa lumalaking pagkabahala sa epekto ng mga desisyon ng pamunuan ng U.S. sa pandaigdigang ekonomiya at seguridad, na direktang nakakaapekto sa mga bansang gaya ng Pilipinas na umaasa sa kalakalan at panlabas na merkado.
Nasa ika-25 araw na ngayong Marso 24, 2026 mula nang ilunsad ang magkasanib na operasyong militar ng U.S. at Israel laban sa Iran na nagsimula noong Pebrero 28, 2026
Ipinahayag ni Trump kamakalawa na nagpapatuloy umano ang mga pag-uusap sa Iran para sa mas malawak na kasunduang pangkapayapaan, at iginiit na “Iran means business.”
Ngunit mariing itinanggi ito ng mga opisyal ng Iran. Tinawag ng Islamic Revolutionary Guard Corps at mga lider ng parliyamento ang pahayag ni Trump na “fake news” at isang “malaking kasinungalingan.”
Ayon sa mga opisyal ng Iran, gawa-gawa lamang ng U.S. ang naturang mga pahayag upang manipulahin ang pandaigdigang merkado ng langis at pananalapi, at upang makakuha ng oras habang dumarami ang tropang Amerikano na ipinapadala sa rehiyon.# (ROSE NOVENARIO)