Opisyal na nagprotesta ang Department of Foreign Affairs (DFA) laban sa China Daily dahil sa umano’y rasistang paglalarawan sa mga Pilipino sa serye ng op-ed videos at editorial cartoons kaugnay ng 2016 South China Sea Arbitral Award, partikular sa isang video na inilathala ng state-owned outlet sa Facebook noong 10 Hulyo 2026.
Ayon sa DFA, lumampas sa hangganan ng lehitimong diskursong politikal ang naturang video. Ipinahayag ni Foreign Affairs Undersecretary Leo Herrera-Lim ang pagtutol ng Pilipinas nang direkta kay Chinese Ambassador Jing Quan sa isang pulong sa Maynila noong 16 Hulyo, at iginiit ang agarang pagtanggal ng mapang-abusong nilalaman.
Binanggit ni Herrera-Lim na ang mga materyales ay salungat sa inaasahang respeto sa pagitan ng mga estado at sumisira sa pagsisikap na pamahalaan nang responsable ang ugnayan ng dalawang bansa.
“Ang ganitong mga paglalarawan ay walang naidudulot na mabuti sa maayos at matatag na pamamahala ng relasyon,” aniya, batay sa pahayag ng DFA.
Sa diplomatic note ng Kagawaran, kinondena ang mga video at cartoon bilang nakasisira at nakaka-dehumanize, na nagbabala na maaaring mawasak ang tiwala sa pagitan ng Maynila at Beijing.
Binigyang-diin din na bagama’t tinatanggihan ng Pilipinas ang naratibo ng Tsina hinggil sa Arbitral Award, hindi katwiran ang pagkakaiba sa legal at politikal na pananaw upang gumamit ng rasistang imahe.
Pinagtibay ng Philippine Embassy sa Beijing ang protesta sa pamamagitan ng liham sa editor-in-chief ng *China Daily*, na muling nanawagan sa agarang pagtanggal ng mga materyales.
Iginiit ng DFA na nananatili itong nakatuon sa diyalogo at diplomasya sa pakikipag-ugnayan sa Tsina, ngunit hindi magdadalawang-isip na kondenahin ang anumang diskriminatoryong retorika saanman ito lumitaw. # (RRN)