Isiniwalat ni Senador Panfilo “Ping” Lacson ang malalim na ugat ng katiwalian sa mga proyekto ng reclamation sa paligid ng Lawa ng Laguna, matapos lumabas sa kanilang Taguig City case study ang mga “ghost slope protection projects” at mga ilegal na na-reclaim na lupain.
Sa isang pahayag sa X, sinabi ni Lacson na ang mga natuklasan ay lumitaw matapos ang kanyang pagpupulong kasama ang mga opisyal ng Philippine Reclamation Authority (PRA), na nagbunyag ng isang “cauldron of worms” sa pamamahala ng reclamation.
“Our Taguig City case study has opened a ‘cauldron of worms’ after my meeting with Philippine Reclamation Authority officials last night — from ghost slope protection projects to illegally reclaimed tracts of land covering Laguna Lake,” ani Lacson.
Binigyang-diin ng senador na ang mga iregularidad ay nagpapakita ng sistematikong pang-aabuso sa kapangyarihan ng pamahalaan, kung saan ang mga proyektong nakatala sa papel ay hindi naman naipatupad sa aktwal, at ang mga lupang nasa baybayin ng lawa ay naangkin nang walang legal na pahintulot.
Ipinangako ni Lacson na magsasagawa ng masinsinang pagtutulungan kasama ang PRA, Ombudsman, Department of Public Works and Highways (DPWH) central office, at Laguna Lake Development Authority (LLDA). Layunin ng koordinasyon hindi lamang ang pag-usig sa mga nasa likod ng “grossly anomalous and patently illegal activities” kundi pati ang pagbawi ng mga na-reclaim na lupain pabor sa pambansang pamahalaan.
“There is no turning back,” giit ni Lacson, na nagpatibay sa kanyang paninindigan na buwagin ang nakaugat na mga network ng katiwalian at ibalik ang tiwala ng publiko sa pamamahala ng reclamation. # (ROSE NOVENARIO)