SINIBAK sa puwesto ang mga hepe ng pulisya ng walong siyudad sa Metro Manila bunsod ng kabiguang sumunod sa “5-minute response time policy for emergency calls.”
Kabilang sa mga tinanggal ni Philippine National Police (PNP) chief Gen. Nicolas Torre III ay ang mga hepe ng Navotas, Caloocan, Valenzuela, Mandaluyong, Marikina, San Juan, Parañaque, at Makati, ayon kay PNP spokesperson BGen. Jean Fajardo.
“Pina-relieve ko ang mga chiefs of police na yun sapagkat hindi sila maka-cope up or ayaw nilang mag-cope up sa standards,” pahayag ni Torre.
“I’ve explained to them, we will not be able…to deliver on the 5-minute response promise, as directed by the President, hindi namin mako-comply ito, kung ganoon ang reaksyon ng mga opisyal na yun,” dagdag niya.
Matatandaan na ipinangako ni Torre na makareresponde ang mga pulis sa Metro Manila sa tawag mula sa 911 sa loob ng limang minute.
Matapos aniya ang tatlong buwan ay target ng PNP na maging tatlong minute ang response time.
Sinabi ni Torre na may sisibakin siyang provincial police directors mula sa Negros Island region, Western Visayas, at Central Visayas. (ZIA LUNA)