Nagbitiw na si Rep. Edvic Yap ng ACT-CIS Partylist sa Kamara de Representantes, na ipinaalam sa plenaryo bago mag-adjourn ang sesyon noong Miyerkules, Enero 4.
Wala pa siyang inilalabas na pahayag hinggil sa kanyang pag-alis, matapos magsilbi mula 2022.
Si Yap ay kabilang sa mga mambabatas na iniimbestigahan dahil sa umano’y pagkakasangkot sa mga iregular na proyekto sa flood control.
Tinukoy siya ni Ombudsman Boying Remulla bilang isa sa tatlong kongresista na konektado sa hindi natapos na ₱275.9-milyong flood control project sa La Union, na ipinagkatiwala sa Silverwolves Construction Corp. na nahaharap sa kasong malversation at graft.
Ayon sa ulat, ang kanyang kapatid na si Rep. Eric Yap ng Benguet ay may di-tuwirang interes sa Silverwolves, na nakapagtala ng mahigit ₱16 bilyon na transaksyon mula 2022 hanggang 2024, karamihan ay kaugnay sa flood control projects.
Natuklasan din ng Anti-Money Laundering Council na nakatanggap ang bank account ni Edvic Yap ng humigit-kumulang ₱70 milyon mula sa mag-asawang kontraktor na sina Sarah at Curlee Discaya.
Noong Disyembre, kinumpirma ni Pangulong Ferdinand Marcos Jr. na isinama sa freeze order ang mga personal na account ng magkapatid na Yap, kasama ng mga ari-arian ng Silverwolves Construction Corp. at Sky Yard Aviation Corp. (RRN)