📷 DILG Secretary Jonvic Remulla
NAILIGTAS ng mga pulis ang isang lalaking senior high school student ng British School Manila sa Taguig City, ayon kay Department of the Interior and Local Government (DILG) Secretary Juanito Victor ‘Jonvic’ Remulla.
Ayon kay Remulla, iniwan ang biktima sa kalye sa Parañaque City.
“The boy was left by his abductors during a hot pursuit operation in the Parañaque area. The cell phone signal of the captors were a few hundred meters away when they found the boy wearing pajamas on the side of the road,” aniya.
“The boy was recovered but the signal of the phone disappeared,” dagdag ni Remulla.
Wala aniyang binayarang ransom ang pamilya ng biktima taliwas sa naunang ulat.
Kinompirma niya na ang bahagi ng isang daliri ng biktima ay naputol kaya’t kasalukuyan siyang nagpapagamot sa ospital.
Tiniyak ng DILG secretary sa biktima at kanyang pamilya na mabibigyan ng hustisya ang kanyang sinapit.
Natukoy na aniya ng mga awtoridad ang mga kidnaper at tinutugis na.
“We know who they are. We know where they are operating from. We will find them. Justice will be served,” sabi ni Remulla.
Matatandaan napaulat na dinukot ang biktima at ang kanyang driver noong Pebrero 20.
Kinompirma ni Remulla na natagpuan na ang mga awtoridad ang bangkay ng driver.
Umuusad ang imbestigasyon sa kaso, ayon sa Southern Police District (SPD) at ihahayag sa publiko ang update. (ZIA LUNA)