Nagpahayag ng buong suporta si Senate President Francis “Chiz” Escudero sa bagong talagang Kalihim ng Department of Public Works and Highways (DPWH), Vince Dizon, kasabay ng panawagan para sa malawakang reporma sa ahensyang matagal nang kinakaharap ang isyu ng katiwalian.
Sa isang pahayag ngayong araw, binigyang-diin ni Escudero ang bigat ng hamon sa DPWH, ngunit iginiit na may malaking pagkakataon si Dizon na magsimula ng mga matagal nang inaasam na pagbabago.
“Ang hands-on na estilo at bagong pananaw na dala ni Sec. Dizon ay mahalaga sa pagharap sa mga ugat ng problema sa DPWH,” ani Escudero. “Ang pagsugpo sa korapsyon ay unang hakbang lamang. Kasinghalaga nito ang pagtiyak na ang bawat proyekto ng DPWH ay tunay na nakatutulong sa buhay ng ating mga kababayan.”
Tiniyak din ng Senate President na handa ang Senado na tumulong sa mga repormang isusulong ni Dizon, lalo na sa mga hakbang na magpapalakas ng transparency, efficiency, at pananagutan sa mga pampublikong proyekto.
“Handa ang Senado na suportahan ang mga reporma ni Sec. Dizon upang matiyak na ang mga proyekto ng pamahalaan ay maayos na naipapatupad, may sapat na pananagutan, at tunay na nagsisilbi sa sambayanang Pilipino,” dagdag ni Escudero.
Ang pagtatalaga kay Dizon ay kasunod ng pagbibitiw ni dating DPWH Secretary Manuel Bonoan, sa gitna ng mga panawagan para sa masusing audit ng mga flood control projects at confidential funds. Inatasan ni Pangulong Ferdinand Marcos Jr. si Dizon na pamunuan ang malawakang paglilinis sa DPWH at ibalik ang tiwala ng publiko sa pamahalaang pang-imprastruktura.
Ang pahayag ni Escudero ay nagpapakita ng pagkakaisa sa pagitan ng lehislatura at ehekutibo sa layuning sugpuin ang katiwalian at itaguyod ang Bagong Pilipinas. (RRN)