📷 Former Bayan Muna Congressman Carlos Isagani Zarate
NILILINLANG ng administrasyong Marcos Jr. ang mga Pinoy sa pagsasabing maliit lamang ang epekto ng bagong ipinatupad na 12% value-added tax (VAT) sa foreign digital services, ayon kay dating Bayan Muna Congressman Carlos Isagani Zarate.
“Mr. Marcos, do not exacerbate further the economic hardships of the Filipino people with your Marcosianomics solution,” sabi ni Zarate.
Iginiit ni Zarate, ang mga mamimili sa huli ang magdadala ng bigat ng pagtaas ng mga gastos, taliwas sa pahayag ng Bureau of Internal Revenue (BIR) na hindi malaki ang itataas ng VAT sa service fees o subscription prices.
“Wag nang lokohin ng Marcos administration ang mga consumers dahil talagang ipapasa sa kanila ng mga digital companies ang buwis na ito at siguradong magpapataas ng singil sa mga ito sa paggamit ng kanilang digital platforms,” ani Zarate.
“Ang 12 % na VAT ay maaaring hindi gaanong mahalaga sa mga oligarchs, mga cronies at malalaking kapitalista, pero sa ordinaryong milyun-milyong Pilipino mabigat na dagdag pasanin ito sa araw-araw,” dagdag niya.
Ang VAT, ayon sa itinakda sa Republic Act (RA) No. 12023 na nilagdaan ni Pangulong Ferdinand Marcos Jr., ay nakakaapekto sa mga pangunahing digital service provider tulad ng Netflix, Disney Plus, HBO, Google, at Amazon.
Bagama’t iminungkahi ni BIR Commissioner Romeo Lumagui Jr. na maaaring hindi tumugma ang pagtaas ng presyo sa 12% VAT rate, binigyang-diin ni Zarate na ang international precedent ay nagpapakita na ang mga konsyumer ang madalas na pumapasan ng mga karagdagang gastos.
Base sa mga bansang tulad ng Singapore, Indonesia, Malaysia, at Thailand na nagpatupad na ng mga katulad na batas sa digital tax, ikinarga ng digital companies ang mga buwis na ito sa kanilang pagpepresyo.
Gayunpaman, ang mga naturang hakbang, ayon kay Zarate, ay maaaring humantong sa mas mataas na gastos para sa mga mamimiling Pilipino, na nakikipagbuno na sa mga hamon sa ekonomiya.
Naniniwala ang Department of Finance na mapapabuti ng bagong batas ang pagkolekta ng VAT mula sa mga dayuhang digital service provider, ngunit nagbabala si Zarate na kung walang tamang pangangasiwa, maaari lamang itong magresulta sa pagtaas ng mga gastos ng konsyumer nang walang makabuluhang benepisyo sa kita.
Nanawagan siya ng transparency at accountability mula sa gobyerno upang matiyak na ang pasanin ng pagbubuwis ay hindi nababagsak sa ordinaryong Pilipino.
Hinamon ni Zarate ang administrasyong Marcos Jr. na itigil ang lahat ng regressive taxation, at, bilang kapalit nito, isabatas ang Wealth Tax para sa may malalaking kita na mga indibidwal at korporasyon. (ROSE NOVENARIO)