📷: DILG Secretary Jonvic Remulla
MAY napili nang bagong Philippine National Police (PNP) chief si Pangulong Ferdinand “Bongbong” Marcos Jr., ayon kay Department of the Interior and Local Government (DILG) Secretary Jonvic Remulla.
Ngunit tumanggi pa si Remulla na kilalanin ang magiging kapalit ni PNP chief Gen. Rommel Marbil at si Marcos Jr. ang mag-aanunsyo nito.
Nakatakdang mag-retiro si Marbil sa Hunyo 7.
“Meron na siyang Napili. Excellent, very qualified, very dynamic, good track record,” sabi ni Remulla.
May bentahe aniya kung ang susunod na PNP chief ay may mas mahabang termino upang ipagpatuloy ang adhikain ng organisasyon.
“Ang nangyayari kasi sa atin, a tenure of a chief PNP will only last one year, a little more than one year. Kailangan natin merong continuing vision na may buy-in ng lahat ng PNP as the years go by,” sabi ni Remulla.
“Ngayon kasi paiba-iba. Every year iba ang directive, vision, mission statement. My goal is that isa na lang. No matter who the Chief PNP is,” dagdag niya.
Kabilang sa mga kandidatong susunod na PNP chief ay sina:
- PNP deputy chief for administration Lt. Gen. Jose Melencio Nartatez Jr., miyembro ng Philippine Military Academy Tanglaw-Diwa Class 1992, ang huling batch ng mga opisyal na nagtapos sa PMA na pumasok sa PNP.
Naging pinuno siya ng National Capital Region Police Office (NCRPO) at police director ng Ilocos Norte.
- Si Gen. Bernard Banac, commander ng Area Police Command Western Mindanao at miyembro ng PMA Class 1992.
Si Banac ay dating director Special Action Force (SAF) at naging pinuno ng Eastern Visayas police. Siya ang namahala sa ginanap na midterm elections sa Bangsamoro Autonomous Region in Muslim Mindanao.
Nagsilbi rin siyang PNP public information officer at spokesman.
- Si Criminal Investigation and Detection Group director Maj. Gen. Nicolas Torre III ay mula sa Philippine National Police Academy (PNPA) Tagapaglunsad Class 1993.
Si Torre ay naging ground commander sa operasyon sa pag-aresto kay dating Pangulong Rodrigo Duterte noong Marso 11.
Bilang director ng Davao region police, pinangunahan ni Torre ang libu-libong pulis na dumakip kay Apollo Quiboloy, lider ng Kingdom of Jesus Christ bunsod ng sex crimes noong September 2024.
Siya rin ang nagpasimuno ng five-minute response to crime policy noong siya’y director of ng Quezon City Police District.
- Si Lt. Gen. Edgar Alan Okubo, chief ng directorial staff at miyembro ng PNPA Tagapagpatupad Class 1992.
Naging pinuno si Okubo ng isang special investigation task group na nag-iimbestiga sa kidnapping at murder ni Filipino-Chinese steel magnate Anson Que.
Tubong Baguio City si Okubo at naging hepe ng Directorate for Police Community Relations, SAF at NCRPO.
- Si NCRPO director Maj. Gen. Anthony Aberin ay miyembro ng PNPA Class1993, ang nag-utos na imbestigahan ang 28 police commanders sa Metro Manila “for operational lapses and other violations.”
Nagsilbi siyang director ng Central Visayas police at ng Aviation Security Group. (ZIA LUNA)