Kinondena ng alyansang pangkarapatang pantao na KARAPATAN at ng Samahan ng Ex-Detainees Laban sa Detensyon at Aresto (SELDA), na nanguna sa makasaysayang class suit laban sa yumaong diktador na si Ferdinand Marcos Sr. sa Hawaii, ang desisyon ng Korte Suprema na ibasura ang hatol ng Sandiganbayan sa kasong graft laban kay dating Unang Ginang Imelda Marcos.
Pinawalang-sala ng Kataas-taasang Hukuman si Marcos sa pitong bilang ng graft, matapos magpasya na hindi napatunayan ng mga piskal ang kanyang pagkakasala nang lampas sa makatwirang pagdududa. Binanggit ng mga kritiko na hindi siya nakulong kahit minsang nahatulan, at ngayo’y malayang namumuhay sa kabila ng tinawag ng mga grupo na isang “malaking dagok” sa dekada-dekadang laban para sa hustisya at pananagutan.
“Ang hatol na ito ay paglapastangan sa mga biktima ng batas militar na ninakawan ng buhay habang ang mga Marcos ay namuhay sa karangyaan,” ani ng mga grupo, na nagbabala na ang pagpapawalang-sala ay nagpapakita kung gaano kalupaypay ang hustisya sa bansang pinagtatakpan ang mga mandarambong habang ang karaniwang mamamayan ang nagdurusa sa korapsyon.
Inakusahan ng KARAPATAN at SELDA ang pamilya Marcos na nagsusulong ng “ganap na rehabilitasyon” ng kanilang pangalan sa ilalim ng pamumuno ni Pangulong Ferdinand “Bongbong” Marcos Jr., at sinabing ang desisyon ay bahagi ng pagsisikap na makamit ang ganap na paglilinis ng pangalan at mapanatili ang bilyon-bilyong yaman na umano’y ninakaw noong diktadura.
Kinuwestiyon din nila ang tiyempo ng anunsyo, na anila’y layong patahimikin ang panawagan para sa pananagutan.
“Malinaw na ngayon kung bakit nakatuon ang mga kasong korapsyon laban sa mga kalaban sa politika ng administrasyon, na siya ring tinolerate at kinasangga nito, habang patuloy na iniiwasan ang mas malaking tanong hinggil sa kasaysayan ng pandarambong ng pamilya Marcos at sa pananagutan ni Ferdinand Marcos Jr. bilang kasalukuyang pangulo sa gitna ng malalaking alegasyon ng korapsyon sa mga proyektong pang-imprastruktura ng gobyerno,” dagdag pa ng mga grupo.
Dagdag nila: “Ang pagbabalik ng pamilya Marcos sa kapangyarihan ay hindi nagbura ng kanilang kasaysayan. Hindi mabubura ng hatol na ito o ng anumang pagtatangkang baluktutin ang rekord ang pagdurusa ng mga biktima ng batas militar o ang nagpapatuloy na laban para mabawi ang nakaw na yaman.”
Nangako ang mga aktibista na maglulunsad ng protesta sa Setyembre 21, anibersaryo ng deklarasyon ng batas militar, laban sa tinawag nilang “garapal na rehabilitasyon” ng mga Marcos.
Tiniyak nila na sa mga lansangan, uugong ang sigaw:
“Imelda Marcos, ikulong! Marcos, mga magnanakaw! Nakaw na yaman, ibalik sa bayan!” # (RRN)