📷Atty. KRISTINA CONTI, ICC Assistant to Counsel
MAAARING maging ‘insider witness’ ng International Criminal Court (ICC) sa isinasagawang imbestigasyon sa crimes against humanity kaugnay sa madugong drug war na ipinatupad ng administrasyong Duterte si Police Major General Romeo Caramat Jr.
“Yes po. Caramat has been involved in several cases and the fact that he led several one time big time operations, so yun yung tinutukoy sakanya e, yun yung sinisilip ng ICC, leads us to the possibility that he knows something,” sabi ni Atty. Kristina Conti, ICC Assistant to Counsel sa panayam ng programang StoryCon sa One News.
“To be a state witness, ang tawag nila doon ay insider witness requires great deal of information that he could provide,” dagdag ni Conti.
Kailangan aniya ay tiyak ang lahat ng impormasyong ibibigay niya sa ICC at kapag nagpasya siyang maging testigo, hindi na siya puwedeng bumaligtad pa.
“Hindi pwedeng basta basta na ay parang alam ko nga yan, dapat alam ko po’ yan. The certainty of his info and of his turning witness, one thing that the court will not do with is turnaboutism yung babaliktarin, recantations, quite common in the court pero they frown on it when they present a witness before the court,” ani Conti.
Kung marami aniyang alam si Caramat at sigurado siya sa lahat ng kanyang ihahayag, puwede siyang humarap sa hukuman bilang saksi lalo na’t mataas ang posisyon sa PNP.
“Kung maraming alam si Caramat at kung sigurado sya sa sasabihin niya, posibleng sya pa yung mag wi-witness on the stand in person at importante yan dahil high enough sya, mataas ang kanyang posisyon na maaaring magdawit sa mataas mag konek doon sa taas na nag utos at doon sa gumawa na nasa baba,” giit ni Conti.
Nauna rito’y, inamin ni National Security Council (NSC) chief Ricardo de Leon Jr. na sinamahan niya si Caramat sa tanggapan ni House Speaker Martin Romualdez dahil gusto ng heneral na ikanta ang kanyang nalalaman sa Duterte drug war kapalit na maitalaga sa posisyon na chief PNP na hindi kinagat ni Romualdez. (ROSE NOVENARIO)