📷Chloe |Instagram
“Behind every successful man is a woman.” 🌺
Ito ang kasabihan sa tuwing nabibisto na babae ang nagsisilbing support system ng isang lalaking nagtagumpay sa buhay o kanyang karera.
“Mahaaaaaal!” ang malakas na tili ni Chloe Anjeleigh San Jose, ang girlfriend ni gymnast Carlos “Caloy” Yulo, nang ipakita sa malaking screen na nakakuha ang nobyo ng 15.000 bilang pangatlong kalahok kompara sa katunggaling si Luke Whitehouse na 14.466 ang score sa finale.
Si Caloy ang kauna-unahang nakasungkit ng Olympic gold para sa Pilipinas sa 2024 Paris Olympics.
Binalot ng matinding emosyon si Chloe, nanginginig habang umiiyak sa tagumpay na nakamit ni Caloy.
Mabilis na kumalat ang balitang siya ang karelasyon ng Pinoy gymnast kaya’t pinalibutan siya ng fans na nagsipalakpakan sa kanyang tabi.
“Hindi ko na po alam ang sasabihin ko, sobrang nakikilig pa din ako, thank you God and thank you po sa family ko na super supportive sa amin ni Caloy,” sabi ni Chloe sa ulat ng Manila Standard.
Habang tinutugtog ang Lupang Hinirang sa kauna-unang pagkakataon sa Paris Olympics, damang-dama nina Caloy, Chloe at bawat Pilipinong nanonood ang kapangyarihan ng bawat titik ng Pambansang Awit ng Pilipinas. (ROSE NOVENARIO)