HINDI dapat isipin ng mga Pinoy na ang nasaksihang televised meeting sa pagitan nina US President Donald Trump, Vice President JD Vance Ukrainian President Volodymyr Zelenskyy ay pagpapakita na ang mga awtoridad ng US ay taos-puso sa kanilang pangako na “ironclad commitment” na ipagtatanggol ang bansa mula sa mga dayuhang mananakop, ayon sa Bagong Alyansang Makabayan (Bayan).
Sinabi ng Bayan na nakahanda ang US na magtalaga ng mga tropa, magpalala ng tunggalian, at magpasimula ng mga proxy wars upang madiskarteng isulong ang geopolitical agenda nito kahit pa makasira ng soberanya ng ibang mga bansa.
Naniniwala ang Bayan na maaari rin talikuran ng Amerika ang mga tinatawag nilang kaalyado kung sa tingin nito ay papabor ito sa mga sakim na interes ng Big Business at ng kanilang mga kroni sa US.
Mula nang maupo sa kapangyarihan noong 2022, si Ferdinand “Bongbong” Marcos Jr ay naging mas malapit sa US sa pamamagitan ng pagbanggit sa maritime dispute ng bansa sa China para bigyang-katwiran ang pagpapalawak ng presensya at operasyon ng militar ng US sa buong Pilipinas, anang Bayan.
Pinahintulutan pa anila ni Marcos Jr. ang pinaigting na pakikialam ng militar ng US tulad ng malakihang provocative military exercises, deployment ng Typhon missile launcher, at ang pagtatayo ng pinagsamang coordination center sa loob ng Camp Aguinaldo.
Sinasabi pa anila ni Marcos Jr na ang mga pagkilos na ito ay kinakailangan upang palakasin ang ating seguridad at mga depensa kahit na ang mga ito ay talagang naglalayong suportahan ang agenda ng gobyerno ng US, na naglalayong pigilin ang China at mapanatili ang hegemonya nito bilang isang pandaigdigang superpower.
Giit ng Bayan, si Marcos Jr at ang gobyernong US ay may malisyong nagsabwatan para gawing lehitimo ang kolonyal na salaysay na kailangan ng permanenteng presensyang militar ng US upang matiyak ang mga hangganan ng bansa.
Paliwanag ng Bayan, ang kamakailang pagpupulong ng Trump-Zelenskyy ay nagpapatunay sa naunang pahayag ng grupo na ang militar ng US ay hindi isang benign power, at ang gobyerno ng US ay isinasaalang-alang lamang ang sarili nitong interes sa pakikitungo sa ibang mga bansa.
Imbes anilang gayahin lamang ang doktrinang panseguridad ng US, dapat ituloy ng gobyerno ng Pilipinas ang isang independiyenteng patakarang panlabas.
Sa halip na gawin ang ‘dirty work’ ng US sa pamamagitan ng pagkaladkad sa bansa sa isang proxy war ng mga pandaigdigang superpower, dapat ubusin ng gobyerno ng Pilipinas ang lahat ng mapayapa at diplomatikong paraan upang resolbahin ang hidwaan ng bansa sa China.
Habang patuloy na ginagawang destabilisayson ni Trump sa mundo sa kanyang mga baliw na kalokohan, muling nanawagan ang Bayan para sa agarang pag-alis ng mga base ng US, ang pagpapatalsik sa mga tropang US, at ang pagkansela ng mabibigat na kasunduan sa militar.
“Upholding our sovereignty and dignity as a nation trumps all other considerations, and this includes the rejection of the corrupt and mendicant foreign policy of the Marcos Jr presidency,” pagtatapos ng Bayan. (ROSE NOVENARIO)